Opammakathāpañha

23 segments · SuttaCentral ·

Tip — double-click any Pāli word to look it up in the dictionary.

← →

0.1

Milindapañha

0.2

Opammakathāpañha

0.3

Makkaṭakavagga

0.4

8. Māgavikaṅgapañha

1.1

“Bhante nāgasena, ‘māgavikassa cattāri aṅgāni gahetabbānī’ti yaṁ vadesi, katamāni tāni cattāri aṅgāni gahetabbānī”ti?

1.2

“Yathā, mahārāja, māgaviko appamiddho hoti;

1.3

evameva kho, mahārāja, yoginā yogāvacarena appamiddhena bhavitabbaṁ.

1.4

Idaṁ, mahārāja, māgavikassa paṭhamaṁ aṅgaṁ gahetabbaṁ.

2.1

Puna caparaṁ, mahārāja, māgaviko migesuyeva cittaṁ upanibandhati;

2.2

evameva kho, mahārāja, yoginā yogāvacarena ārammaṇesuyeva cittaṁ upanibandhitabbaṁ.

2.3

Idaṁ, mahārāja, māgavikassa dutiyaṁ aṅgaṁ gahetabbaṁ.

3.1

Puna caparaṁ, mahārāja, māgaviko kālaṁ kammassa jānāti;

3.2

evameva kho, mahārāja, yoginā yogāvacarena paṭisallānassa kālo jānitabbo ‘ayaṁ kālo paṭisallānassa, ayaṁ kālo nikkhamanāyā’ti.

3.3

Idaṁ, mahārāja, māgavikassa tatiyaṁ aṅgaṁ gahetabbaṁ.

4.1

Puna caparaṁ, mahārāja, māgaviko migaṁ disvā hāsamabhijaneti ‘imaṁ lacchāmī’ti;

4.2

evameva kho, mahārāja, yoginā yogāvacarena ārammaṇe abhiramitabbaṁ, hāsamabhijanetabbaṁ ‘uttariṁ visesamadhigacchissāmī’ti.

4.3

Idaṁ, mahārāja, māgavikassa catutthaṁ aṅgaṁ gahetabbaṁ.

4.4

Bhāsitampetaṁ, mahārāja, therena mogharājena—

5.1

‘Ārammaṇe labhitvāna,

5.2

Pahitattena bhikkhunā;

5.3

Bhiyyo hāso janetabbo,

5.4

Adhigacchissāmi uttarin’”ti.

6.1

Māgavikaṅgapañho aṭṭhamo.